2024/07/12

Udalak lotura zerbitzua jarriko du abian larunbat honetan Astiko disuasio-aparkalekuan. Horrela, asteburu honetatik aurrera beste aukera bat izango da Zarautzen autoa aparkatzeko, hiriguneko kaleak zeharkatzen ibili gabe.

Iazko udan ezarritako neurriak izandako harrera onaren ondoren, aurten ere formula bera erabiltzea erabaki da, uda garaian saihestu daitekeen trafikoa hirigunetik ateratzeko.

Aparkalekua Asti kirol gunean dago eta bertan aparkatzea guztiz doakoa da. Herriko erdigunera hurbiltzeko autobus lotura zerbitzua jarriko da, aparkalekua Nafarroa kalea eta Lizardi kalea lotzen dituen biribilgunean dagoen geltokiarekin lotzeko, hondartzatik 50 metro eskasera.

"Aurten lotura zerbitzua Servicios Globales Araba enpresaren mikrobus batekin gauzatuko da, iazko udan erabilitako txu txu trena ordezkatuko duena", azaldu du Iker Basurko Mugikortasun zinegotziak (EAJ-PNV). "Horri esker, ibilbidea azkarrago eta eraginkorrago egin ahal izango dugu, eta, gainera, udalarentzat kostua txikiagoa izango da".

Lotura zerbitzuaren ordutegia 10:00etatik 14:00etara eta 16:00etatik 20:00etara izango da, eta 20 minutuko maiztasunarekin funtzionatuko du. Zerbitzuak 2 euroko kostua izango du pertsonako eta txartela autobusean bertan eskuratuko da, joateko zein itzultzeko balio izango duena.

Geltokiak totem batekin eta kokapen-mapa batekin seinaleztatuta egongo dira, aurkitzeko errazak izan daitezen, helmuga eta irteera puntu beretik egingo dira.

Zerbitzua larunbat honetan bertan, uztailaren 13an, jarriko da martxan, eta irailaren 15era arte luzatuko da.