Agrégateur de contenus

Retour iñurritza zozketak

IÑURRITZAKO 24 BOE ETA 36 ETXEBIZITZA TASATUEN ZOZKETETAN PARTE HARTZEKO PROZESUA IREKITZEAR DA

2023/02/17

Salberdineko R14 partzelako 92 etxebizitza tasatuen zozketa gauzatu ondoren, datozen egunetan babesturiko etxebizitzen beste bi zozketetan parte hartzeko prozesuak martxan jarriko direla jakinarazi du Xabier Txurruka (EAJ-PNV) alkateak.

“Guztira babesturiko 60 etxebizitza esleitzeko ondorengo bi prozesuak aurkeztu ditugu”, adierazi du Txurrukak. “Babes Ofizialeko 24 Etxebizitza eta 36 Etxebizitza Tasatu hauek Iñurritzako Eguzki Izarra partzelaren hegoaldean egongo dira kokatuta”.

2023ko urtarrilaren 24an egindako bilkuran, Zarauzko Udalaren Tokiko Gobernu Batzarrak onespena eman zion Amenabar Taldeak sustaturiko 13.2 —Iñurritza— areako Eguzki Izarra jarduera integratua urbanizatzeko proiektuari. Sustatzaileak dagoeneko aurkeztu du Udalean babesturiko 60 etxebizitzen proiektua, eta zozkatuko diren etxebizitzen programa honela banatuta dago:

1º zozketa: ERREGIMEN OROKORREKO BABES OFIZIALEKO 24 ETXEBIZITZA:
- Bi logelako etxebizitza 1, mugikortasun murriztu iraunkorra duten pertsonentzat gordetakoa (etxebizitza egokitua)
- Bi logelako etxebizitza 1
- Hiru logelako 22 etxebizitza
2º zozketa: ERREGIMEN AUTONOMIKOKO 36 ETXEBIZITZA TASATU:
- Bi logelako 2 etxebizitza, mugikortasun murriztu iraunkorra duten pertsonentzat gordetakoak (etxebizitza egokituak).
- Bi logelako 7 etxebizitza.
- Hiru logelako 27 etxebizitza.

Udalak Zarautz Lur, S.A. Udal Etxebizitza Bulego Publikoari enkargatuko dio Babes Ofizialeko Etxebizitza eskatzaileen eta Etxebizitza Tasatuen eskatzaileen zerrendak sortzea. Esleipen-prozeduraren oinarriak Gipuzkoako Aldizkari Ofizialean argitaratzen direnetik, 30 egun naturaleko epea irekiko da ETXEBIDE Babes Publikoko Etxebizitzak Esleitzeko Zerbitzu Publikoan izena emanda dauden pertsonak eta bizikidetza-unitateak zerrendetan sartu ahal izateko.

Zerrendan izena emateko, eskatzaileek honako baldintza orokor hauek bete beharko dituzte:

1. ETXEBIDE Babes Publikoko Etxebizitza Esleitzeko Zerbitzu Publikoaren Etxebizitza Eskatzaileen Erregistroan alta emanda egotea zozketaren oinarriak onartu ziren egunerako.

2. EGOITZA: Zarautzen erroldatuta egon beharra. Zozketaren oinarriak onartu ziren egunetik zenbatzen hasita, etengabe gutxienez 5 urtez edo, etenaldiekin edo gabe gutxienez 10 urtez egon beharko du erroldatuta bizikidetza-familiako kideren batek.

3. ERRENTA: 2021eko ekitaldiko diru-sarrera haztatuak hartuko dira kontuan, eta bi zerrendetan izena emateko baldintza ekonomikoak desberdinak izango dira:

a. Erregimen Orokorreko BOEen onuradunen gehienezko diru-sarrera haztatuak 39.000 euro izango dira eta gutxienekoak, aldiz, 12.000 euro.

b. Erregimen Autonomikoko Etxebizitza Tasatuen onuradunen gehienezko diru-sarrera haztatuak 50.000 euro izango dira eta gutxienekoak, aldiz, 15.000 euro.

Izen ematea

Eskaera orria modu presentzialean aurkeztu daiteke Zarautz-lurren bulegoan (Salegi kalea 14) edo modu telematikoan, Udalaren web atariko egoitza elektronikoaren bitartez.

Pertsona edo bizikidetza-unitateko eskaera bakarra onartuko da. Dokumentazio guztia salerosketako kontratu pribatua sinatu baino lehen aurkeztu beharko da.

Etxebizitza Eskatzaileen Erregistroan izena emateko eskaera, eskaera-eredu ofizialean aurkeztuko da. Eredu hori eskura egongo da Zarautz-lurren bulegoan (Salegi kalea 14), Amenabarren bulegoetan (Donibane plaza 7), udal webgunean eta sustatzailearen webgunean.

Prezioak

Babes Ofizialeko Etxebizitzek izango duten prezioari dagokionez, garestienak 177.402,32 euroko prezioa izango du (BEZ gabe) eta, Etxebizitza tasatuen kasuan, 258.377,27 euroko (BEZ gabe) prezioa edukiko luke garestienak. Etxebizitzarekin batera, garajea eta trastelekua gehitu beharko dira prezio honetara.