2024/03/01

Gipuzkoako Urak Zarauzko hainbat tokitan sektorizazio lanak egiten arituko da astelehenetik aurrera. Sektorekatze-lan horiek sarea eremu txiki eta isolatuetan, sektoreetan, banatzeko egingo dira, eta sektore hauek arteria nagusiekin lotutako sarrera bat edo gehiago izango dituzte.

Sektorizazioaren helburu nagusia ur hornidura sarea zehatz-mehatz ezagutzea da, eta horrek zerbitzu hobea ematea ahalbidetuko du. Sektorizazioak sarea hobeto kudeatzeko eta eskura dauden baliabideekin eraginkorragoa izateko aukera ematen du:

-    Hobeto orientatutako ihes-bilaketak.
-    Erabiltzaileen kontsumoaren ezagutza.
-    Inbertsioak hobeto planifikatzea.
-    Sintomarik gabeko ihesak detektatzea.

Zarautzen kasuan, Gipuzkoako Urakek egingo dituen lan horiei esker, 7 sektore berri sortuko dira, lehendik daudenekin batera: Azken Portu, Nagusia, Geltoki, Mendilauta, Lizardi, Asti eta Hiruerreketa.

Sektorizazio horrekin batera, egoera txarrean dauden pasoko giltzak ordezteko aprobetxatu nahi da, eta saneamendu kutxatilak eraberritu eta birgaitu Musika Plazan, Kale Nagusian, Nafarroa kalean eta Zumalakarregi kalean.

Obrak datorren astelehenean, martxoak 4, hasiko dira, Alde Zaharrean egin beharreko lanekin, eta, ondoren, Azken Portu, Geltoki kalea, Zuberoa kalea, Mitxelena kalea, Asti eta Hiruerreketa guneetako obrekin jarraituko dute, maiatzaren amaieran Lizardi kalean, Nafarroa kalean eta Zinkunegi kalean amaitzeko. Guztira, sektorizazio-obrek 10 asteko iraupena izatea aurreikusten da.

Egin beharreko lanei edo izan ditzaketen eraginei buruzko informazio gehiago nahi izanez gero, Gipuzkoako Urak-ekin harremanetan jarri ahal izango da bere webgunean edo 900 322 222/943 002 222 telefonoetan.