2021/10/22

Zarauzko Udaltzaingoko bide heziketako agenteek urte osoan zehar egiten duten lan didaktikoaren barnean prebentzio jarduera batzuk antolatu dituzte herriko gazteekin bizikletan ibiltzerakoan argiak eramatearen garrantzia nabarmentzeko. Informazio kanpaina honen helburua urteko sasoi honetan argitasun gutxiko egoeratan zaurgarriak diren bizikleta gidariak babestea da.

Datozen asteetan, goizean goiz ikastetxeetara joaten diren ikasleak, urteko argi gutxieneko goizetan mugituko dira eta istripu bat izateko aukerak gora egiten dute.

Horretarako, bide heziketako udaltzainak Oteiza Lizeoko eta Lizardi Institutuko batxilergoko 1. eta 2. mailako ikasleekin bildu dira argiak eramatearen garrantzia nabarmentzeko. Era berean, ikasle hauen artean 550 bizikletarako argi banatu dira. Argi hauek modu errazean jarri eta kentzen dira bizikletatik eta USB bidez kargatzen dira.

Prebentzio kanpaina eta argien banaketa egin ondoren, Udaltzaingoak goizean dabiltzan bizikleten argiteriaren kontrola egingo du, kontzientziazioa areagotzeko eta segurtasuna bermatzeko .