2025/05/09

Beste urte batez, udaberri amaierarekin batera iritsiko da Literaturia, asteburu batez Zarautz euskal letren plaza bihurtzeko asmoz. Aurtengo ediziorako ere ekitaldi ugari antolatu dira gune desberdinetan. Lege Zaharren Enparantzan kokatuko da berriro ere Literaturiako liburu azoka, eta aurreko edizioan bezala, aurten ere larunbata izango da azoka eguna. Goizez eta arratsaldez, argitaletxeek beraien postuetan euskal literaturako liburuak izango dituzte erakusgarri; eta aurten ere, liburu aurkezpenak azokako karpan bertan egingo dira.

“Beste urte batez, pozgarria da Zarauzko Udalarentzat Literaturiaren ondoan izatea. Euskal literatura sustatzen egiten duten lana eskertzekoa da, urtero-urtero euskal idazle beterano zein gazteen lana balorean jarriz eta publikoari gerturatuz”, azaldu du Irune Urbieta (EAJ-PNV) Kultura zinegotziak ekimen honen aurkezpen saioan. “Udala, orain arte bezala, aurrerantzean ere Literaturiaren bidelagun izango da, gure herrian euskara eta euskal kultura indartzen laguntzeko. Horretarako, dirulaguntzaz gain, eskura izango dituzte Udalaren baliabideak, aurtengo kasuan, Modelo Aretoa, Santa Klara eta Etxezabalako aretoa”.

Azoka eta liburu aurkezpenez gain, hainbat tailer eta ekitaldi izango dira asteburuan zehar. Ekitaldietarako sarrerak gaurtik aurrera eskuragarri izango dira Literaturiako webgunean zein Modelo Aretoko leihatilan.

​​​​​​​