Zarauzko Udalak eta Gipuzkoako Urakek sinaturiko elkarlan hitzarmenaren baitan, azken honek udalerriko ur saneamendu eta hornidura sareak hobetzeko inbertsioak gauzatzen ditu. Jarraian, Udalak lan hauek baliatzen ditu eskuhartzeak gauzatu diren guneak berrurbanizatzeko.
Honela, Gipuzkoako Urakek aste honetan hasi ditu Balea eta Madoz kaleetako etxebizitzei eragiten dien ur saneamendu, hornikuntza eta euri uren hoditeria sareak hobetzeko lanak. Lan hauek, duela pare bat urte Gipuzkoako Ur Kontsortzioak Nafarroa kalean gauzaturiko lanen jarraipena da.
Behin hoditeria sareak hobetzeko lanak amaitzen direnean, Udalak bi kale hauetako berrurbanizazioa gauzatuko du. Lan hauek 4 hilabeteko luzapena izango dutela aurreikusten da.
