2024/11/22

Zarauzko Udalak, Turismo departamentuaren bitartez, eta Murkil Zarauzko Dendari Elkartearen laguntzaz, Gabon giroa sustatzeko asmoz, establezimendu komertzialei zuzendutako XLII. ERAKUSLEIHO LEHIAKETA antolatu du. Aurten, partehartzea indartzeko asmoz, sarien berrantolaketa egin da, zenbatekoa handituz besteak beste, eta honela banatuko dira sarituen artean:

-    1. saria -> 800 € eta trofeoa.
-    2. saria -> 500 €.
-    3. saria -> 300 € (Murkil Dendarien Elkarteak emandakoa).

Murkil Dendarien Elkarteak 100 €ko 5 erosketa-txeke zozkatuko ditu partehartzaile guztien artean. Honez gain, 1., 2. edo/eta 3. sariaren establezimendu irabazleak elkarteko kide badira, 100 €ko erosketa-txeke gehigarri bat ere izango dute.

Aurreko edizioetan bezala, epaimahaiak honako irizpideak izango ditu kontuan euren ebazpena egiterako orduan:

-    Erakustokiaren aurkezpena.
-    Salgai diren artikuluen erakusketa erakargarria.
-    Dekorazioaren originaltasuna, Gabon garaia kontuan izanik.
-    Euskal ohitura eta tradizioekin lotutako gaiak izatea.

Materialen erabilera iraunkorra eta hondakinen murrizketa sustatze aldera, epaimahaiak baloratuko du material birziklatu eta/edo birziklagarrien erabilera, kanpainan zehar erabilitako produktu, material eta baliabideei balioa emateko, hondakinen sorrera ahalik eta gehien murrizteko.

Erakusleihoetan jarritako mezuak euskaraz egongo dira. Euskaraz eta gaztelaniaz edo beste hizkuntza batzuetan jartzen badira, euskara lehenetsiko da.

Erakusleihoak abenduaren 10etik urtarrilaren 6a arte apainduta egon beharko dute. Epaimahaiaren erabakia abenduaren 18an jakinaraziko da. Parte hartu nahi duten establezimenduek Turismo Bulegoan eman beharko dute izena, abenduaren 10a aurretik, 943 83 09 90 telefonora deituz.