2024/09/26

Zarauztarrok gogo biziz ospatu dugu iraila hasieran Euskal Jaiaren mendeurrena, guretzat hain kuttuna den festa honen ibilbide luzea gogoratzeko eta goraipatzeko balio izan duten ekitaldi eta omenaldiz beteriko programarekin.
Zarauztarren artean harrera onenetakoa izan duen ekimenetako bat Merkatu Plazan prestatu den ‘Euskal Jaiak 100 urte’ erakusketa izan da. Bertan, festa hauen ibilbide luzea ezagutzeko aukera izan da, jaiotzatik azken urteetaraino.

Abuztuaren 29tik irailaren 22ra arte egon da erakusketa zabalik eta, epe horretan, 3.215 bisitari pasa dira Merkatu Plazako lehen pisuan kokaturiko erakusketa honetatik.

Behin amaituta, Zarauzko Udaleko Kultura departamentuak erakusketa honek zarauztarrengan izan duen harreraren oso balorazio positiboa egin du. Irune Urbieta (EAJ-PNV) Kultura zinegotziak adierazi duen moduan, “erakusketa honek zarauztar askoren bihotzetara iristea lortu du. Eskertzekoa da erakusketa hau osatzeko hainbeste jendek gauzatutako lan gogorrak hain harrera ona izan duela ikustea”.