2024/05/03

Mendeurrena ospatzen du aurten Euskal Jai Egunak eta, data borobil hau ospatzeko, Zarauzko Udala, hainbat eragilerekin elkarlanean, egitarau berezia ari da prestatzen. Prozesu honen baitan, hainbat ekimen jarri dira martxan jada, hala nola, Euskal Jai Eguneko mendeurrenerako logo lehiaketa edota festa hauen inguruko galdetegia.

Galdetegia martxoan aurkeztu zen eta zarauztarrek hilabeteko epea izan dute euren ekarpenak egiteko, honako hiru galdera irekiei erantzunez:

•    Zein da zure ekitaldi gustukoena gaur egungo Euskal Asteko egitarauan?
•    Zarauzko Euskal Jaiaren 100. urteurrena ospatzeko proposamen berezirik baduzu?
•    Etorkizunerako proposamenik baduzu?

Galdetegiaz gain, herritarrek Zarauzko Turismo Bulegoan euren ekarpenak egiteko aukera ere izan dute. Behin erantzunak jaso eta aztertu ondoren, hauek dira aurtengo galdetegitik ateratako datu esanguratsuenak, hurrenez-hurren:

1.    Zein da zure ekitaldi gustukoena gaur egungo Euskal Asteko egitarauan?
-    Erromeriak
-    Alproja taldearen antzerkia
-    Munoako kontzertuak
-    Erraldoi eta buruhandiak
-    Euskal Jai Eguna, bera.
-    Ttuntturroak
-    Larrain Dantza Musika Plazan, eguerdian.
-    Jolasak

2.    Zarauzko Euskal Jaiaren 100. urteurrena ospatzeko proposamen berezirik baduzu?
-    Karrozak
-    Haurrentzat eta gazteentzat ekintza gehiago
-    Apar festa
-    Euskal Kirolak
-    Egun gehiago
-    Dokumentazio lana egitea (bideoa / liburua)
-    Janzkerari buruzko erakusketa

3.    Etorkizunerako proposamenik baduzu?
-    Euskal ezaugarriak indartzea (janzkera)
-    Ganadu feria
-    Karrozak
-    Euskal taldeen emanaldiak
-    Haurrentzat eta gazteentzat ekintza gehiago
-    Puzgarriak, ur jolasak…

(Galdetegiko erantzunak eskuragarri daude albistearen amaieran).

Egitarauan lanean

Proposamen hauez gain, Udalak hilabeteak daramatza mendeurreneko Euskal Jai honetarako egitaraua osatzeko lanean.
Ekimen asko dira mahai gainean daudenak baina, momentuz, hauek dira aipagarrienak eta martxan daudenak:

Argazki erakusketa: 100 urte hauetan bizitako esperientziak eta ekitaldiak gogora ekartzeko asmoz, Zarauzko Udalak erakusketa berezi bat antolatuko du abuztua eta irailean, Merkatu plazako lehen pisuko espazioan. 100 urte hauetako errepasoa egiteko, Udalak enkargua egin dio Photomuseumi dokumentazioa biltzeko, izan ere, Foto Garren funtsaren inbentarioa eta digitalizazioa ari dira burutzen gaur egun eta Euskal Jaiaren gaiak presentzia nabarmena du artxibo horretan. Batetik, lan horretaz baliatuko dira erakusketa osatzeko, baita Euskal Jaien hasiera ofizialaren aurretik egiten ziren jaien inguruko dokumentazioaz ere: esku-programak, prentsan azaldutako informazioa, kartelak eta abar.

Zuazobideren karrozen maketa erakusketa: Euskal Jai Egunean hain adierazgarriak diren karrozak ere nabarmenduko dira erakusketa honetan. Horretarako, Joxe Mari Zuazobidek urteetan zehar egindako 30 karroza ingururen maketak eta argazkiak ikusgai izango dira, argazki erakusketarekin batera.

Euskal jantziei buruzko erakusketa herriko erakusleihoetan: Euskal jantziek garrantzia eta protagonismo handia dute Euskal Jai Egunean. Herrian badira hainbat eragile eta pertsona urteetan zehar jantziak gorde izan dituztenak eta, hala, beraien laguntzari esker eta Murkil elkarteari esker, herriko hainbat erakusleihoetan ikusgai egongo dira Euskal Astean garaiko eta egungo jantziak. Honekin batera, 75.urteurrenean kaleratu zen jantziei buruzko liburuxka berriz argitaratuko du Udalak.

Karrozak: Euskal Jai Egunaren 75.urteurrenean antolatu zen, azkenekoz, karroza lehiaketa. Usadio horrek presentzia izan behar du mendeurrenean eta, hala, Udalak karroza lehiaketa jarriko du martxan. Oinarriak datozen asteetan argitaratuko dira.

Dokumental berezia mendeurrena ospatzeko.

Ekimen guzti hauez gain, hauek ere lantzen ari da Udala: Iturengo ttuntturroekin elkarlanean ekimen berezi bat egitea; haurrentzat eta gazteentzat ekimen gehiago jartzea Euskal Astean eta Euskal Jai Egunean; emanaldi berezi bat Ondartza taldearen eskutik, euskal dantza errepaso irekiak; kartel lehiaketa; eta abar. Ekimenen lanketak aurrea egin ahalak, Udalak informazioa zabalduko du.

​​​​​​​