2022/03/09

Igande honetan, martxoaren 13an, Aztarnak dokumentala ikusteko aukera izango da Modelo Aretoan goizeko 11:30etan. Ikustaldiaren ondoren, solasaldi bat izango da ikusitakoaren inguruan hausnarketa egiteko.

Maru Solares zinemagileak zuzendutako luzemetraia honek pasa den urteko Donostiako Zinemaldiaren Ikusmira sekzioa itxi zuen. Dokumental honek haur baten jaiotza eta haurtzaroko lehen urteetan bizitakoak pertsona batengan uzten dituen aztarnak aztertzen saiatzen da egilearen ikuspuntu pertsonala eta arloko profesionalen ikuspuntuak uztartuz.

Azterketa honetan erantzunak topatzeko, gai honetan espezializatutako profesional ezberdinen aportazioak jaso dira, besteak beste: Ramon Mauduit (psikologoa), Cristina Aznar (ginekologoa), Ibone Olza (psikiatra perinatala), Michel Odent (obstetra), Laura Gutman (amatasun gaietan aditua)…

Dokumentala ikusi ostean solasaldia egongo da gaiaren inguruan gehiago sakontzeko. Bertan Ramon Mauduit psikologoa, Maider Leunda pediatra eta Julene Armendariz terapeuta perinatala izango dira solasean.

Sarrera doakoa izango da, aforoa bete arte, eta dokumentalaren emanaldia zein solasaldia elebitan egingo da.