2024/11/22

Dagoeneko amaitu dira Astiko kantinaren eraikuntza lanak. Udatik hona, Astiko aisia gunean kokaturiko kantina berriaren eraikuntzaz gain, lokalaren hornikuntza eta saneamendu sarearen doikuntza eta inguruko urbanizazio lanak egin dira eta behin prest dagoela, espazio hau zarauztarren gozamenerako prest izateko beharrezkoak diren pausuak ematen jarraituz, Zarauzko Udalak kantina esleitzeko emakida abiatu du.

Emakida honen baitan, kantina bezala erabiliko den 440,22 m2-ko lokalaren ustiaketa esleituko da, prozesu administratibo bitartez. Barra gunea eta barruko bi jangelez (67,74 m2 eta 46,33 m2) gain, 34,93 m2 eta 42,38 m2-ko bi terraza gune izango ditu kantinak.

Esleipenaren epea 8 urtekoa izatea erabaki da, negozioa martxan jartzeko esleipendunak egin beharko duen inbertsioa (sukaldearen muntaketa, hozkailuak…) berreskuratzeko denbora emateko. Lizitaziorako gutxieneko kanona 12.000 euro urteko izango da eta lizitatzaileek gorantz hobetu ahal izango dute.

“Urte luzez itxaron behar izan dugu Astiko kantina berriz martxan ikusteko eta jada gertu daukagu denok udal azpiegitura honetaz gozatzeko aukera izango dugun eguna”, adierazi du Iban San Martin (EAJ-PNV) Obra eta Zerbitzuen zinegotziak. “Obra nagusia amaituta dago eta emakida esleitu eta esleipendunak lokala prest jartzea besterik ez da geratzen irekitzeko”.

Emakidaren inguruko informazio eta dokumentazio osoa eta bertan parte hartzeko jarraitu beharreko pausuak Udaleko Kontratatzailearen Profilean argitaratuko dira datorren astean. Lizitatzaileek, beren ebaluaziorako, kantina bisitatu ahal izango dute, udal teknikariekin hitzartutako bisita baten bidez.

Prozesuaren edo lokalaren inguruko galdera edo zalantzarik izanez gero, kontaktuan jarri Udaleko Herrilan departamentuarekin (herrilanak@zarautz.eus / 943005108).