Asteazken honetan ospatuko da 43. Lizardi Sariaren sari banaketa ekitaldia Modelo Aretoan, 19:00etan. Bertan, Alaine Agirre bizkaitarrak jasoko du edizio honetako sari, “Euri eta ateri” lanari esker lortutakoa. Honela, bigarren aldiz lortu du literatura sari honetan gailentzea, 33. edizioan “Hau ez da zoo bat” lanarekin ere saritua izan ondoren.
Ekitaldian zehar, epaimahaiaren epaiaz eta garailearen hitzaldiaz gain, 44. Lizardi Sariaren aurkezpena egingo da eta Idoia Garzesek gazte literaturaren inguruko manifestua irakurriko du. Ekitaldi guztia Zarauzko Musika Eskolako musikarien doinuekin osatuko da.
Sarrera librea izango du ekitaldiak, aforoa bete arte.
