2025/03/14

Zarauzko Udalak, Mugikortasun departamentutik, taxiaren zerbitzu publikoaren egoera aztertu du azken hilabeteetan. Zerbitzua hobetu daitekeela jakinda, lanari ekin dio, eta sektorearen egungo egoerari buruzko azterlan bat egin ondoren, Zarauzko Taxiaren Planean definitutako jarduera-ildo nagusiak aurkeztu ditu orain.

"Taxia zerbitzu publiko gisa hobetzea da hiri eta herri askoren erronka nagusietako bat mugikortasunaren arloan. Egia da, halaber, gero eta zailagoa dela taxiko profesional gisa irautea, lanbide horretan esklusiboki arituz", adierazi du Iker Basurko (EAJ-PNV) Mugikortasun zinegotziak. "Hirietan, eta gurea bezalako herrietan, oso zaila izatea eragiten duten aldagai batzuk aipa ditzakegu: mugikortasunaren kultura aldatzea, gaur egun merkeagoak eta diruz lagunduak diren garraio publikoko beste zerbitzuen hobekuntza, share car (auto partekatua) modalitatea merkatuan sartzea, eta horri Eusko Jaurlaritzaren araudi zaharkitua gehitu beharko litzaioke (2002tik aldatu ez den araudia); izan ere, araudi horrek, besteak beste, ez du uzten aldi baterako lizentziak ematen eskaera handiko garaian, eta lizentzia duten profesionalei ere ez die uzten beste pertsona bat kontratatzen beren ibilgailuak egunean ordu gehiagotan zerbitzua ematen jarrai dezan".

Zarauzko Taxiaren Plan honek aldaketak egingo ditu gaur egun funtzionatzeko moduan, eta hobekuntzak eta arau-proposamenak egingo dizkie hobekuntzak ezartzeko eskumena duten beste erakunde batzuei.

Plan hau taxiko profesionalekin batera gauzatuko da hasieratik, eta, ondoren, beste erakunde batzuekin elkarlana sustatzeko intentzioa dauka, hala nola Urola Kostako Mankomunitatearekin, Gipuzkoako Foru Aldundiarekin eta Eusko Jaurlaritzarekin. "Plan honek hainbat eskuhartze izango ditu epe laburrera Udalaren eskutik eta epe ertainera, espero dezagun, gainerako erakundeen laguntzarekin", gehitu du Basurkok.

Planean jasotako epe laburreko jarduketa aipagarrienen artean, Zarauzko Udalaren eta taxilarien arteko hitzarmena sinatzea nabarmentzen da, elkarrekin aurrera egiteko konpromiso gisa, edo taxiaren egungo geltokia birkokatzeko azterlana.

Egungo geralekua tren-geltokiaren ondora lekualdatuko da, gune estrategikoa delako, eta, aldi berean, herritarrek erabiltzeko oso gune interesgarria libre geratuko delako (zamalanetarako plazak, egoiliarrak). Era berean, aurreikusita dago bigarren geraleku bat jartzea (Brigadaren eraikinaren ondoan), etorkizunean kokapen horretan egokituko den autobus geltoki berrian gehituko dena.

Dokumentuak taxilarientzako urteko tasa kentzeko aukera ere jasotzen du, zerbitzu hori eskaintzen duten herri gehienetan egiten den bezala, eta herriko taxilari guztientzako adostutako egutegi bat ezarriko da, oporretarako edo gaueko guardietarako, beti gutxieneko zerbitzu bat egon dadin.

Azkenik, komunikazio-kanpaina bat jarriko da abian, herritarrei egiten diren jardueren berri emateko eta taxia Zarautzen garraio publikoaren alternatiba baliozkotzat izan dadin saiatzeko.

Aldi berean, Udalak jarduera batzuk landuko ditu, inplementatzeko zailagoak direnak, eta beste erakunde batzuen laguntza eta parte-hartzea eskatzen dutenak, hala nola Urola Kostako Mankomunitatearena, Gipuzkoako Foru Aldundiarena edo Eusko Jaurlaritzarena. "Erakundeen arteko lankidetzari dagokionez, laster bilduko gara Mankomunitatearekin, Urola Kostan erregimen bereziko eremu gisa lan egin ahal izateak ematen dizkigun aukerak eta potentziala aprobetxatzeko gai izan behar baitugu", amaitu du Basurkok.